Act 1 | NdeIBE | STEP | Encwadini yami, mandulo kwale, Theyofilu, ngalandisa ngakho konke uJesu akwenzayo lakufundisayo

Acts 1

UJesu Ukhutshulelwa Ezulwini

1 Encwadini yami, mandulo kwale, Theyofilu, ngalandisa ngakho konke uJesu akwenzayo lakufundisayo 2 kwaze kwafika usuku akhutshulwa ngalo waya ezulwini, esenike imilayezo ngoMoya oNgcwele kubaphostoli ayebakhethile.

3 Ngemuva kokuhlupheka kwakhe waziveza emadodeni la watshengisa iziqiniselo ezinengi ukuthi wayephila. Wabonakala kubo okwesikhathi esiyizinsuku ezingamatshumi amane, ekhuluma ngombuso kaNkulunkulu.

4 Ngesinye isikhathi, kwathi esidla labo wabanika umlayo lo, wathi; “Lingasuki eJerusalema, kodwa lilindele isipho leso uBaba asithembisayo, elezwa ngikhuluma ngaso.

5 Loba uJohane wabhaphathiza ngamanzi, kodwa ngemuva kwezinsuku ezilutshwana lina lizabhaphathizwa ngoMoya oNgcwele.”

6 Yikho kwathi sebehlangene ndawonye bambuza bathi, “Nkosi, khathesi usuzabuyisela umbuso ko-Israyeli na?”

7 Wathi kubo: “Kakusikho kwenu ukwazi izikhathi kumbe izinsuku uBaba azimisileyo ngokuthanda kwakhe. 8 Kodwa lina lizakwamukela amandla nxa uMoya oNgcwele esefikile phezu kwenu; njalo lizakuba ngofakazi bami eJerusalema, lakulo lonke eleJudiya lase-Samariya, lasemikhawulweni yomhlaba.”

9 Esekutshilo lokhu wakhutshulwa phambi kwamehlo abo, iyezi lamfihla ababe besambona.

10 Kwathi belokhu besakhangele ngawo wonke esibhakabhakeni khonokho ehamba, masinyane kwema eduze kwabo amadoda amabili egqoke okumhlophe.” 11 Athi, “Madoda aseGalile, limeleni lapha lijolozele esibhakabhakeni na? Yena lo uJesu osethethwe kini wasiwa ezulwini uzabuya ngayonale indlela elimbone esiya ngayo ezulwini.”

UMathiyasi Uyakhethwa Esikhundleni SikaJudasi

12 Basebebuyela eJerusalema besuka eqaqeni oluthiwa yiNtaba yama-Oliva, ummango olikhilomitha kusuka edolobheni.

13 Ekufikeni kwabo bakhuphukela endlini ephezulu lapho ababehlala khona. Ababelapho ngu-Phethro, loJohane, loJakhobe, lo-Andreya; uFiliphu loTomasi, loBhatholomewu loMathewu; uJakhobe indodana ka-Alifewu loSimoni umZilothi, loJudasi indodana kaJakhobe. 14 Bonke laba bahlangana kokuphela bekhuleka, bekanye labesifazana loMariya unina kaJesu kanye labafowabo bakaJesu.

15 Kuzona lezozinsuku uPhethro wasukuma phakathi kwamakholwa (ixuku elalingafika ikhulu elilamatshumi amabili) 16 wathi, “Bazalwane, uMbhalo kwakumele ugcwaliseke, lokho okwakhulunywa nguMoya oNgcwele ekadeni ngomlomo kaDavida mayelana loJudasi owaba ngumkhokheli walabo ababopha uJesu –

17 wayengomunye wenani lethu waba lengxenye kule inkonzo.”

18 (Ngomvuzo awuzuzayo ngenxa yomona wakhe, uJudasi wathenga isiqinti; khonapho wawa ngekhanda, isidumbu sakhe sadubuka amathumbu akhe wonke aphihlika. 19 Bonke eJerusalema bezwa ngalokho, yikho babiza isiqinti leso ngolimi lwabo bathi yi-Akhelidama, okutsho iSiqinti seGazi.)

20 UPhethro wathi, “Ngokuba kulotshiwe encwadini yamaHubo ukuthi, “ ‘Sengathi indawo yakhe le ingafulathelwa; kakungabi lamuntu wokuhlala kuyo,’ njalo kuthiwa, “ ‘Sengathi omunye angathatha isikhundla sakhe sobukhokheli.’

21 Ngakho kuyasweleka ukukhetha omunye wamadoda ayekade elathi sonke isikhathi iNkosi uJesu yayiphakathi kwethu, 22 kusukela ekubhaphathizeni kukaJohane kuze kufike esikhathini lapho uJesu wathathwa kithi. Yikho omunye wabo laba kabe ngufakazi kanye lathi ngokuvuka kwakhe.”

23 Ngakho basebemisa amadoda amabili: uJosefa owayethiwa nguBhasaba (esaziwa njalo ngokuthi nguJustu) loMathiyasi. 24 Basebekhuleka bathi, “Nkosi, uyayazi inhliziyo yalowo lalowo. Sitshengise ukuthi nguwuphi walaba ababili omkhethileyo 25 ukuthatha lesisikhundla sobuphostoli, uJudasi asitshiyayo esiya lapho ayefanele khona.” 26 Basebesenza inkatho, yadla uMathiyasi, wasesengezwa kubaphostoli abalitshumi lanye.